SaiRose...

தேடிச்சோறு நிதந்தின்று
பல சின்னஞ்சிறு கதைகள் பேசி
மனம் வாடித்துன்பமிக உழன்று
பிறர்வாடப் பலச்செயல்கள் செய்து
நரை கூடிக்கிழப்பருவமெய்தி
கொடுங்கூற்றுக்கிரையெனப்பின்மாயும்
பல வேடிக்கை மனிதரைப்போலே
நானும் வீழ்வேனென்று நினைத்தாயோ?.....!


Wednesday, August 13, 2014

முகமூடி...!


வாழ்க்கைப்பாதையின் பயணங்களில்
கடந்து வந்த மனிதர்கள்
கணக்கிலடங்கா எண்ணிக்கையெனினும்
ஒரு முறைகூட பார்க்க நேர்ந்ததில்லை
உண்மையான மனித முகங்களை!

காலைநேர கசங்கிய
பேருந்து பயணத்திலும்
சாலையோர இரைச்சலான
நடைப்பயணங்களிலும்
தொலைதூர அமைதியான
ரயில் பயணங்களிலும்
கடற்கரையில் வானம் வெறிக்கும்
நேரக்கடத்தல்களிலும்
மனிதர்கள் பல கடந்து வந்தும்
ஒரு முறைகூட பார்க்க நேர்ந்ததில்லை
உண்மையான மனித முகங்களை!

அலுவலகங்களிலும் உத்தியோகத்திலும்
உயரதிகாரி, உதவியாளர்
கணக்காளர், காசாளர்
என்று விதவிதமான பெயர்களில்
உதட்டு சிரிப்பு, கண்டிப்பு,
கர்வம், ஆணவம், அடிமைத்தனம் என
ஒவ்வொருவருக்கும் மாட்டப்பட்டிருக்கிறது
பலவிதமான முகமூடிகள்...!

உறவுகள் எனும் பந்தங்களிலும்
பணக்காரன், படித்தவன்,
பட்டிக்காட்டான்,
என்று விதவிதமான பெயர்களில்
நாகரீகம், அலங்காரம், அவமானம், செருக்கு என
ஒவ்வொருவருக்கும் மாட்டப்பட்டிருக்கிறது
பலவிதமான முகமூடிகள்...!

பொழுதுபோக்கும் கனவுத்தொழிற்சாலையிலும்கூட
நடிகன், நடிகை, இயக்குனர், இசையமைப்பாளர்
என்று விதவிதமான பெயர்களில்
அந்தரங்கம், ஆட்சி ஆசை
பப்ளிசிட்டி, பொய்யான வாழ்க்கை என
ஒவ்வொருவருக்கும் மாட்டப்பட்டிருக்கிறது
பலவிதமான முகமூடிகள்...!

ஒவ்வொரு நாட்டின் தலையெழுத்திலும்கூட
அதிகாரி, அரசியல்வாதி, அமைச்சர் என
விதவிதமான பெயர்களில்
சர்வாதிகாரம், ஊழல்,
மக்கள் விரோதம், லஞ்சம் என
மனசாட்சியின்றி மாட்டப்பட்டிருக்கிறது
பலவிதமான முகமூடிகள்...!

கணவன் மனைவி
உறவுக்குள்ளும்கூட
மாட்டப்பட்டிருக்கிறது
வெளியில் பகிர்ந்துகொள்ளமுடியா
பல கடந்தகால மற்றும்
சில நிகழ்கால முகமூடிகள்...!

ஆழமான நட்புகளாய்
அன்பாய் அறியப்பட்டிருந்த
பலவித உறவுகளுக்குள்கூட
சிலவருட பிரிவுகளுக்குப் பின்னமே
புரிகிறது...
கடந்தகாலங்களில் மாட்டப்பட்டிருந்த
பலவிதமான முகமூடிகள்...!

தள்ளுவண்டி கடைக்காரர், பேருந்து நடத்துனர்
போக்குவரத்து காவல்காரர், சாலையோர வியாபாரி
வீட்டு உதவியாளர், பிச்சைக்காரர்
கோயில் பூசாரி, பூக்காரர்
ஆட்டோக்காரர், மருத்துவர்
டீக்கடைக்காரர், பெட்டிக்கடைக்காரர்
பெருமுதலாளி, சலவைக்காரர் என
அன்றாட வாழ்வில்
சந்திக்க நேரிடும்
சகமனிதர்கள் ஒவ்வொருவருக்கும்
மாட்டப்பட்டிருக்கிறது
பலவிதமான முகமூடிகள்...!


இங்கே
முகமூடிகள் இல்லாத மனிதவாழ்க்கை
சாத்தியமற்றதா?...
இல்லை...
முகமூடிகள் இல்லாமல் மனிதர்கள் வாழ்வது
விருப்பமற்றதா?...

நொடிக்கு நொடி
பாடம் கற்பிக்கும்
புரியாத பள்ளிதான்
வாழ்க்கையா?...

இல்லை...
ஒவ்வொரு அனுபவமும்
ஒவ்வொன்றை உணர்த்தும்
புரியாத பாடம்தான்
வாழ்க்கையா?...

கடந்து வந்த வாழ்க்கைப்பாதையை
ஒருமுறை திரும்பிப்பார்க்கும்போதுதான் புரிகிறது...
பல சந்தர்ப்பங்களில்
பல முறைகள்
எனக்கும் மாட்டப்பட்டிருக்கிறது
இன்னமும் கழற்றவே முடியாத

பலவிதமான முகமூடிகள்...!


4 comments:

  1. வணக்கம்
    சபாஷ் சரியாக சொன்னீர்கள் பலவிதமான முகமூடிகள்பற்றி...பகிர்வுக்கு நன்றி
    ரூபனின் எழுத்துப்படைப்புக்கள்: இதயத்தை திருடியது நீதானே.....:      

    -நன்றி-
    -அன்புடன்-
    -ரூபன்-

    ReplyDelete
  2. பல சந்தர்ப்பங்களில்
    பல முறைகள்
    எனக்கும் மாட்டப்பட்டிருக்கிறது
    இன்னமும் கழற்றவே முடியாத

    பலவிதமான முகமூடிகள்...! // True

    ReplyDelete
  3. இதையும் தாண்டி அவ்வப்போது மனிதரின் கருணையும் அன்பும் பரிவும் பொங்கும் நிஜ முகங்களையும் தரிசித்துக் கொண்டிருக்கிறோமே.. இல்லையா.

    ReplyDelete