SaiRose...

தேடிச்சோறு நிதந்தின்று
பல சின்னஞ்சிறு கதைகள் பேசி
மனம் வாடித்துன்பமிக உழன்று
பிறர்வாடப் பலச்செயல்கள் செய்து
நரை கூடிக்கிழப்பருவமெய்தி
கொடுங்கூற்றுக்கிரையெனப்பின்மாயும்
பல வேடிக்கை மனிதரைப்போலே
நானும் வீழ்வேனென்று நினைத்தாயோ?.....!


Sunday, November 25, 2012

கும்பகோணமும் கோமாளிச்சட்டமும்...!!!


சமீபத்தில் ஒரு பத்திரிக்கையை புரட்டிக்கொண்டிருந்தபோது கும்பகோணம் பள்ளிக்கூட தீவிபத்து வழக்கு விசாரணையைப்பற்றி படிக்க நேர்ந்தது. அந்த தீவிபத்தின் மறுநாள் செய்தித்தாள்களில் கருகிய பிஞ்சுகளின் படங்களைப்பார்த்து கட்டுப்படுத்தமுடியாமல் கண்ணீர் வடித்தவர்களில் நானும் ஒருவன். ( இவ்வளவுக்கும் அப்போது எனக்கு திருமணம்கூட நடந்திருக்கவில்லை. திருமணமாகாத ஒருவருக்கே அது தாங்க முடியாத துயரமென்றால், பெற்றோர்கள் என்ற நிலையிலிருந்து அந்தச்செய்தியை எதிர்கொண்டவர்களின் மனநிலை எப்படியிருந்திருக்கும்?. அதைவிட அந்த நிகழ்வில் குழந்தைகளைப் பறிகொடுத்த பெற்றோர்களின் மனநிலை எப்படியிருந்திருக்கும்?...) ஏற்கனவே வெகுநாட்களாகவே நமது நாட்டில் பல வழக்குகள் மீடியாக்களாலும், மக்களாலும் அப்போதைய காலகட்டத்தில் மட்டும் பரபரப்பாக பேசப்பட்டு சில நாட்களுக்குப்பின்னர் எவ்விதத் தகவலுமின்றி அமுங்கிப்போவதைப் பற்றி பதிவெழுதவேண்டும் என்று எண்ணிக்கொண்டிருந்தேன்.

கும்பகோணம் பள்ளிக்கூட தீவிபத்து வழக்கின் சமீபத்திய விசாரணையில் அந்த விபத்தில் காயங்களுடன் உயிர்தப்பி வாழ்ந்து கொண்டிருக்கும் குழந்தைகளிடம் குற்றவாளித்தரப்பு வழக்கறிஞர்கள் நீதிமன்றத்தில் இடைவெளியின்றி அடுத்தடுத்து கேள்வி கேட்டு குழப்பியிருக்கிறார்கள். ஒரு மனசாட்சியில்லாத வக்கீல் தீவிபத்தில் தப்பிய ஒரு சிறுவனிடம் அதே தீவிபத்தில் இறந்துபோன அவனது நண்பனைப்பற்றி விசாரணை என்ற பெயரில் தீ விபத்தில் இறந்துபோன அவனது நண்பன் தீப்பற்றிய போது என்ன செய்து கொண்டிருந்தான்?. அவன் உடலில் முதன் முதலில் எங்கு தீப்பிடித்தது?... என்றெல்லாம் கேள்விகேட்டு குழப்பியிருக்கிறார். இது எல்லாவற்றுக்கும் மேலாக அந்தக்கட்டுரையின் இறுதியில் குற்றவாளித்தரப்பு வழக்கறிஞர் ஒருவர் பேட்டியளித்திருக்கிறார்.

அதில் அவர் ‘’இது ஒரு விபத்து. அவ்வளவே தவிர எனது கட்சிக்காரர் (அந்தத்தனியார் பள்ளியின் கரஸ்பாண்டன்ட்) குற்றமற்றவர். அரசாங்க வக்கீல்கள்தான் தேவையில்லாமல் அந்த தீ விபத்தில் தப்பிய குழந்தைகளை வைத்து பொய்சாட்சி சொல்லவைக்கிறார்கள்’’ என்று தனது அதிபுத்திசாலிமான கருத்தைப்பதிந்திருக்கிறார்.

அந்த வக்கீலின் சட்டையைப்பிடித்து சில கேள்விகள் கேட்க வேண்டும் என்று தோன்றியது. அதை இங்குதான் கேட்கமுடியும்...

அய்யா வழக்கறிஞரே... உங்களுக்கு என்னுடைய (எங்களுடைய) ஒரே கேள்வி இதுதான். ஒருவேளை உங்கள் வீட்டு பிஞ்சுகள் அந்தப்பள்ளியில் படித்து அந்தத் தீவிபத்தில் இறந்திருந்தால் அப்போதும் உங்கள் பதில் இதுவாகத்தான் இருந்திருக்குமா?...

ஏற்கனவே இருக்கும் ஓட்டைகளில் எல்லாம் உங்களைப் போல பல பெருச்சாளிகள் புகுந்து விளையாடி பல குற்றவாளிகளை பாதுகாப்பாக உலவ விட்டதோடுமில்லாமல் புதிதாக குற்றம் புரிய திட்டமிடுபவர்களுக்கு கூட பயமில்லாத மனநிலையை உண்டாக்கி வைத்திருக்கிறீர்கள். தீவிபத்து நடந்து 94 பிஞ்சுகள் கருகியது 2004ம் ஆண்டு. 2012ம் ஆண்டுதான் வழக்கு தஞ்சை செஷன்ஸ் கோர்ட்டிலேயே நொண்டியடிக்க ஆரம்பித்திருக்கிறது. இன்னமும் இது செல்ல வேண்டிய தூரம் உயர்நீதிமன்றம், உச்சநீதிமன்றம் என்று நிறைய இருக்கிறது. எங்களுக்குத்தெரியும்... உங்களைப்போன்ற வக்கீல்கள் இருக்கும்வரை நிச்சயம் நீதி கிடைக்காதென்பது. இந்த வழக்கு விசாரணையை இழுத்தடித்து உங்கள் வருமானத்தை தக்கவைத்துக்கொள்ள நீங்கள் இதை உச்சநீதிமன்றம் வரை இழுப்பீர்கள் என்பதும் வழக்கு முடிவதற்குள்ளாகவே அதற்கு காரணமான குற்றவாளிகள் அனைவருமே வயோதிகமடைந்து இயற்கையாகவே மரணித்துப்போய் உங்கள் கல்லாப்பெட்டிக்கு சில்லறைபோட நீங்களும் அடுத்தடுத்த குற்றவாளிகளை தயார் செய்திருப்பீர்கள் என்பதும் புதிதல்ல.

குற்றங்களும், ஊழல்களும் நாளுக்கு நாள் பெருகிக்கொண்டிருப்பதன் ஒரே காரணம் நமது சட்டத்தின் சாராம்சம்தான். எவ்வளவு பெரிய குற்றம் புரிந்தாலும் ஜாமீனும், வாய்தாவும், குற்றவாளிக்கும் ஆதரவளிக்கும் வழக்கறிஞர்களும் இருக்கும்வரை இங்கே குற்றங்கள் பெருகிக்கொண்டேதான் இருக்கும்.

கும்பகோணத்தில் பிஞ்சுகள் கருகிக்கிடந்த சோகத்திலும் அதற்கு காரணமானவர்களுக்கு ஆதரவாக வாதாட இங்கே வக்கீல்கள் இருக்கிறார்கள்.

உயிர்காக்கும் மருந்துகளில் போலிகளை உலவ விட்டு மக்களின் உயிரோடு விளையாடி கோடிகளை சம்பாதித்தவர்க்கு ஆதரவாக வாதாடவும் இங்கே வக்கீல்கள் இருக்கிறார்கள்.

நிதி நிறுவனம் என்ற பெயரில் ஏழை எளியவர்களின் பணத்தை விழுங்கி ஏப்பம்விட்டு பல குடும்பங்களை நடுத்தெருவில் நிறுத்தியவர்களுக்கு ஆதரவாக வாதாடவும் இங்கே வக்கீல்கள் இருக்கிறார்கள்.

இவ்வளவு ஏன்?... வக்கீலை நடுரோட்டில் வெட்டிக்கொன்றவர்களுக்கும், சப்-இன்ஸ்பெக்டரை நடுரோட்டில் வெட்டிக்கொன்றவர்களுக்கும்கூட ஆதரவாக வாதாட வழக்கறிஞர்கள் இருக்கிறார்கள்.

கேட்டால் குற்றவாளியாகவே இருந்தாலும்கூட தங்களிடம் வரும் கிளைன்ட்டுகளுக்கு ஆதரவாக வாதாடி அவர்களை விடுவிப்பதுதான் தங்களது வக்கீல் தொழில் தர்மம் என்பார்கள்.

ஒவ்வொரு குற்றங்களுக்குப்பின்னாலும் நேரடிக்குற்றவாளிகள் மட்டுமில்லாமல் பல மறைமுக குற்றவாளிகளும் எந்தவித தண்டனையுமில்லாமல் உலவுவதும் குற்றங்கள் பெருகுவதன் மற்றுமொரு காரணம்.

கும்பகோணம் தீவிபத்தில் அந்தத்தனியார் பள்ளியை நடத்திய தாளாளர் மட்டும்தான் குற்றவாளியா?... சரியான அடிப்படை வசதியற்ற, பாதுகாப்பற்ற அப்படியொரு கட்டிடத்தில் பள்ளிக்கூடம் நடந்ததை அனுமதித்த அரசு அதிகாரிகளுக்கு எந்தவொரு தண்டனையுமில்லையா?...

ஒவ்வொருமுறை பள்ளிக்குழந்தைகளை ஏற்றிச்செல்லும் வாகனங்கள் விபத்துக்குள்ளாகும் போது அந்த வாகனத்தை ஓட்டிய டிரைவர் மீது மட்டும் வழக்கு பதிந்துவிட்டு பராமரிப்பில்லாத வாகனத்தை பள்ளிக்குழந்தைகளை ஏற்றிச்செல்லும் வாகனமாக அனுமதித்த பள்ளி நிர்வாகம் மீதும், அப்படிப்பட்ட வாகனங்களை முறையாக ஆய்வுசெய்யாத அரசு அதிகாரிகள் மீதும் எந்தவித வழக்கும் பாயாதா?...

விபத்துக்கள் நடக்கும் முன்பே விழித்தெழாமல் பள்ளிவாகனங்கள் விபத்துக்குள்ளாகும்போது மட்டும் ரொம்ப யோக்கியர்கள் போல எல்லா பள்ளி வாகனங்களையும் ஆர்.டி.ஓ ஆபீசிற்கு வரச்சொல்லி சோதனையிடும் அதிகாரிகளின் கடமை உணர்ச்சியை நினைக்கும் போது தலையிலடித்துக் கொள்வதை தவிர வேறு வழியில்லை நமக்கு!.

சப்-இன்ஸ்பெக்டர் ஆல்வின் சுதனை கொன்ற ரவுடிகளை ஆரம்பத்திலேயே களையெடுக்காமல் காவல்துறையின் கைகளை கட்டிப்போட்ட காவல்துறை உயரதிகாரிகளுக்கு எந்தவித தண்டனையுமில்லையா?...

ஆல்வின் சுதனை கொன்ற ரவுடிகள்மீது ஆரம்பத்திலேயே நடவடிக்கை எடுக்காமல் காவல்துறையின் கைகளை கட்டிப்போட்ட உயரதிகாரிகளுக்கு தண்டனை என்ன தெரியுமா?... வெறும் இடமாற்றம்... இந்த இடமாற்றம்தான் அவர்கள் செய்த தவறுக்கு தண்டனையென்றால் அவர் புதிதாக பொறுப்பேற்றிருக்கும் இடத்திலும் அதேப்போல ரவுடிகளை வளரவிடமாட்டார் என்பதற்கு என்ன உத்திரவாதமிங்கே?...

நிதிநிறுவன மோசடி வழக்குகள் ஏராளமிங்கே. ஆனால் இதுவரையிலும் எதாவது ஒரேயொரு நிதிநிறுவன அதிபராவது தண்டனை பெற்றிருக்கிறாரா?... மோசடி செய்தவர்கள் அனைவருமே மோசடி செய்த பணத்திலேயே வழக்குக்கும் செலவு செய்து கொண்டு வாழ்க்கைக்கும் செலவு செய்து கொண்டு சொகுசாய் வாழ்ந்து கொண்டிருக்கிறார்கள். அந்த வழக்குகளின் கதி என்னானது என்று எடுத்துக் கூறுவதற்குகூட இங்கே எந்தவொரு ஊடகத்திற்கும் மனமில்லை. பரபரப்பு செய்திகளுக்கு மட்டுமே முன்னுரிமை கொடுக்கும் மக்களின் மனநிலையும், ஊடகங்களின் நடைமுறையும் பல பழைய வழக்குகளின் ஊத்திமூடப்பட்ட நிலையை வெளிக்கொண்டு வருவதேயில்லை. (என்னைப்பொருத்தவரை 2ஜி ஊழல்கூட அல்ரெடி இந்த வரிசையில் சேர்ந்தாகிவிட்டது!)

இங்கே ஏதாவது ஒரேயொரு ஊழல் அரசியல்வாதியாவது கடுமையான தண்டனை பெற்றதற்கான வரலாறுகளோ, இல்லை... கடுமையான தண்டனை பெறுவதற்கான சாத்தியக்கூறுகளோ உண்டா?...!

வெறுமனே கசாப்பை தூக்கிலிட்டுவிட்டு தீவிரவாதத்தையே அடியோடு ஒழித்தது போலவும், நீதியை நிலைநாட்டியது போலவும் மார்தட்டிக்கொள்ளும் அரசும், நீதிமன்றங்களும் இன்னும் கொஞ்சம் ஆழச்சிந்திக்கவேண்டும். அந்தத்தீவிரவாத தாக்குதலில் வெளிவந்த மற்றுமொரு ஊழல் தரமற்ற புல்லட் புரூஃப் ஜாக்கெட். அந்த ஊழலை மறைக்க அதன் அத்தனை ஆதாரங்களும் வெகு சாதாரணமாய் அழிக்கப்பட்டதை இங்கே எத்தனை மீடியாக்கள் முக்கியத்துவம் கொடுத்திருக்கிறது?...

ஜாமீன்களும், வாய்தாக்களும், அப்பீல்களும் திருத்தி எழுதப்படாதவரை இங்கே சட்டம் வெறும் செல்லாக்காசுதான். நீதி என்பது நிதி உள்ளவன் வகுத்ததுதான்.

குற்றம் செய்தவர்கள் சட்டத்தின் பிடியில் இருந்து தப்பமுடியாத சூழலும், கடுமையான தண்டனைகளும் நிறைவேற்றப்படாதவரை இங்கே குற்றங்களும், ஊழல்களும் குறையவேப்போவதில்லை என்பதுதான் நிஜம்.

கட்டுரையை படித்து முடித்த உங்களுக்கு ‘’இந்த நாடும் நாட்டு மக்களும் நாசமாய்ப்போகட்டும்’’ என்ற பழைய வில்லன் நடிகர் பி.எஸ்.வீரப்பாவின் டயலாக் நியாபகத்துக்கு வந்தால் அதற்கு நான் பொறுப்பல்ல!!!
 
 
 

No comments:

Post a Comment